Өзімді өзім танумен өсіп келем...

  • Жүктеулер: 0
  • Көрсетілім: 791
  • Тәрбие сағаты
  • 08/Апр/2016

Жарияланған материалдың жеке номері: 18522


Өндіріс орта мектебі


Сыныптан тыс
Тәрбие сағаты


Өткізген:
Өзін-өзі тану мұғалімі: Холганат Данекер


Тақырыбы: Өзімді өзім танумен өсіп келем...
Мақсаты: оқушылардың өмірдің мәні туралы түсініктерін кеңейту, өмірдің адам үшін маңыздылығын жан - жақты ашу, өзін - өзі танып, өмірдің мәнін түсінуге, өмірге құштарлығын дамыту
Тәрбиелік мәні: адам бойындағы адамгершілік қасиеттерін дамыту, өз – өзіне деген сенімін арттыру, адами қарым - қатынасты қалыптастыру.
Көрнекілігі: «Ізгілікке бастар жол» стенд, шарлар, нақыл сөздер, С. Назарбаева туралы кітап бұрышы.
1-Жүргізуші.
Ашылуы: Вальс
1-жүргізуші:Армысыздар құрметті ақжарқын жүзді Ұстаздар қауымы, ата-аналар, сүйкімді оқушылар!
Мектебімізде 2 - 12 ақпан аралығында Еліміздің бірінші ханымы Сара Алпысқызы Назарбаеваның туған күніне орай Махаббат пен Шығармашылық педагогикасы» атты онкүндік өтті. Бұл күндері сіздер өздеріңізді жан - жақты танытуға, өзгені тануға және өмірдің кез-келген жағдайында түрлі салаларда өздеріңді сынап көруге мүмкіндік берілуде. Сіздердің қабілеттеріңіз бен ішкі мүмкіндіктеріңіздің ашылуына барынша жағдай жасалуда. Баршаңызға қош келдіңіздер дейміз.
2-жүргізуші
Сара Алпысқызы Назарбаеваның ұйымдастыруымен 1992 жылы «Бөбек» қоры құрылған. Бұл қор 7 жасқа дейінгі балаларды қамқорлыққа алып, олардың әлеуметтік жағынан қорғалуына көмектеседі.
«Өзіңді - өзің тану - рухани өркендеудің түп тамыры және адамгершілік құндылықтардың негізі» деген Сара Алпысқызы - болашақ ұрпақты ізгілік бесігіне бөлейтін, ешкімге еліктемей өзіндік тұлғасын қалыптастырып, өз мүмкіндіктерін ашатын, дарындылығын дамытатын, қоршаған ортамен жарасымды өмір сүруге бейімделген тұлға қалыптастыратын «Өзін - өзі тану» білім жобасының авторы. Ол 1941 жылы 12 ақпанда Қарағанды облысының, Қызылжар ауылында дүниеге келген.
Жалпы адамзат өмірі - іс - әрекеттер тізбегінен, басқалардың әрекеттерін қабылдаудан және оларға деген түрлі көзқарастан тұрады.
2-жүргізуші: Келесі кезекте 4-сынып оқушыларына береміз.
Жақынды, досты аяла,
Қанатың сонда талмайды.
Барыңды жұрттан аяма.
Жақсылық жерде қалмайды.
Жайдары жүзбен жарқыра.
Қатыгез болсаң сол қайғы.
Қайырымды бол халқыңа,
Жақсылық жерде қалмайды.
Жақсылыққа жетем десең, қолыңда.
Бар жақсылық жақсы адамның жолында.
Жаман болып тумайды ешкім анадан.
Жаман адам қайдан шыққан соңында?
Соны ойла да өзіңе - өзің есеп бер.
Көктем - өмір, көкөрім бәйшешектер.
Екі жол бар жағаласып жататын,
Жақсылыққа апаратын жетекке ер.
Желдей жүйткіп жылдармен.
Мен де өсіп келемін.
Отанымды сүйемін.
Қадірін оның білемін.
Мектепке де барамын.
Білімнің бойлап тереңін,
Үйренемін ұғамын.
Өмірдің жинап керегін.
Керек болса керегім.
Қол ұшымды беремін.
Адал туған Отанға.
Ұлы болсам деп едім.
Жүректен жанға жылы сөз барма елде,
Жүрексіз тірлік барма суда, жерде.
Қашанда өмір жолы - жүрек сыры.
Тілеуін сол жүректің айтам менде.
Аяулы болғандықтан асыл жүрек.
Өз орнын кеудеден кең алып бөлек.
Күмбезде берік жылы өмір сүріп.
Өзіңді жамандықтан жүрер демеп.
Жүргізуші:
Әрбір адам білім нәріне сусындамас бұрын тәлім-тәрбиеден өтеді. Ұстаздың ұлағаты шәкіртіне білім нұрын төкпей тұрып санасына сан қырлы сәуле құюы да жоғарыдағы баба сөзінің салмағы болар. Білім беру үрдісінде адамның үйлесімді даму міндеті тек әлемдік және ұлттық мәдениеттің үлгілерін құндылықты меңгеру арқылы ғана шешілетіні анық, өйткені тұлғаның бойында дүние танымдық және мінез-құлықтық бағдарламалардың қалыптасуы білім беру сапалы болғандығын білдіреді.
Қазіргі таңда осы мәселе, яғни келешек ұрпақтың адамгершілік рухани құндылықтарын дамыту арқылы білім беру мәселесі алға қойылып отыр.
1-жүргізуші:
Осы орайда жас ұрпақтың рухани мәдениетін арттырып, көркемдік әлемін байытуда, дүниетанымын қалыптастырып, салауаттылыққа тәрбиелеуде «Өзін-өзі тану» пәнінің орны ерекше.
Бұл пән жеке тұлғаның өзін-өзі тануына және рухани баюына әсер ете отырып, әрбір тұлғаның жақсы жаққа өзгеруіне мүмкіндік береді.Сонымен қатар ол жеке тұлға ретінде өзін-өзі тануға және өмірлік ұстанымын, дүние танымдық деңгейін анықтайтын құндылықтар сапасына ие болуға бағыт-бағдар береді. Адамгершілік-рухани тұрғыдан дәріс алған балалар өмірлік маңызды құндылықтар жүйесін зерделейді, рухани және материалдық арақатынас мәселесін пайымдай отырып өзіндік көзқарастарын шыңдай түседі.

Келесі кезекті тамаша өлең шумақтарды қабыл алыңыздар:
1-оқушы Бейбіт
Жаңа - жаңа мен ұғына бастадым.
Өмір деген - қымбат екен достарым.
Өмір - менің жарқылдайтын аспаным.
Өмір - менің сарқылмайтын дастаным.
Мен - өмірді жас зерттеуші, жас ғалым.
Енді оянып, енді зерттей бастадым.
Өмір - кітап түсінуі тым қиын,
Әрбір күнім - әрбір бетін ашқаным.
2-оқушы
Жағылды ма жүрегіме жаңа шам.
Ойлауменен өтед ылғи оңашам.
Армандаймын ұлы еліме сүйікті.
Жақсылықтар жасасам деп орасан.
Маржан іздеп терең теңіз түбінен
Күн батарда атар таңға үңілем.
Өмірімнен, өз ортамнан үйреніп,
Жақсы адамға айналармын түбі мен.
3-оқушы
Шешілмейтін жұмбағы сұрағы көп,
Бұл өмірге келген соң бір - ақ рет.
Қалу керек өмірдің бұлағы боп.
Қалу керек өмірдің шуағы боп.
Табиғатта сезімде, құлақ та бар.
Ренжітсең күрсініп жылап та алар.
Аяласаң жаныңа шуақ тамар.
Қажығанда бойыңа қуат болар.
4-оқушы
Өмір деген, тұрады таң мен кештен,
Ғұмырлы екі араны жанмен кешкен.
Құпия, жұмбақ, сырлы дүниеге.
Адамдар Армен келіп, Армен көшкен.
Өмір деген – көк мұхиттың толқыны,
Бір - бірімен жатқан шулап жалғасып,
Бір - бірімен жатқан тулап арбасып,
О, толқындар арпалысып, алға шық.
5-оқушы
Өмір деген пәк жаралған махаббат.
Ғашықтықтан жарқылдаған көздері,
Ұғынбайтын өз ойынан өзгені,
Өз жүрегін өртейтұғын өз демі.
Өмір деген - мәңгі гүлдеп жататын,
Құштарлықтың толғағы мен көктемі.
Ешкім оған қоя алмайды нүктені.
Өмір деген сөйлем емес өйткені.
Жүргізуші.
«Әр баланың қабілетін ашуы, өзіне жол табуы, өзінің күш - жігеріне, өзінің жазмышына сенуі өте маңызды» Сара Назарбаева айтқанындай.
Егер өмірде өзіңе - өзің сенімді болғың келсе, қиындықпен бетпе-бет кездесуден қорықпа. Үнемі өмір сынақтарынан жасқанып, қашқақтай берсең, кезең - кезең қиындықтар туындай береді, өзіңмен өзің әлектене бересің. Сондықтан жеңіл жол іздеме, қиындықпен күресе біл. Қиындықты жеңе білген кезде ғана өзіңе өзің сенімді боласың, өз құныңды білесің. Егер ұмтылыс пен табандылық жеткілікті болса, адам қандай кедергіні де жеңуге қабілетті болады. Осының өзі саған өзіңе деген сенімділік әкеледі.
1-оқушы
Өзіңе сен! Күшіңе сен бойдағы ерен,
Сенім деген киелі қойма дер ем.
Көл - көңілдің жатпайды жайнап үсті.
Жеңілу де, жеңіс те бұл өмірде.
Бәрі достым өзіңе байланысты
2-оқушы
Өзіңе сен, өзіңнің күшіңе сен.
Қос қолыңмен істелген ісіңе сен,
Алысың да, сыйлайды жақының да.
Өзіңді өзің төменге түсірмесең.
Өз қайығың бар болса, өз ескегің.
Өмірде мен сені осал демес едім.
Қимылдай бер тарта бер ескегіңді.
Шығады алдан жап - жарық келешегің.
3-оқушы
Мұрат етіп шындықты,
Ақиқатқа жүгінем.
Адалдықты ардақтап,
Жалғандықтан түңілем.
Үлкендердің ақылын,
Ақ бата деп ұғынам,
Шынын айтқан кішінің.
Пәктігіне қызығам.
Өтірік айтып өрікпіп,
Жамандыққа бармайық.
Алдаймын деп өзгені,
Өзіміз ұятқа қалмайық.
Әр нәрсенің байламын,
Шындықпенен шешейік.
Дақ түсірмей жүрекке,
Тәтті ғұмыр кешейік.
4-оқушы
Жақсы мінез, жылы сөз - жан дәруі,
Жігіттің мұны керек аңғаруы.
Бейпіл сөйлеп, тік мінез танытқанның.
Тіптен оңай адасып, сандалуы.
Мінездер бар жақсы – жаман, әр алуан,
Әдептілік әділдіктен нәр алған.
Кең болғанның, кем болғанын көрмедім.
Теңізге ұқсап тасып жатқан шараңнан.
Жақсы болу өзіңнен.
Жаман болу өзіңнен.
Өзіңді өзің аяда.
Өзің үйрен өзіңнен.
Жақсылық көрсең біреуден
Мен қандаймын деп ойла,
Өзіңді өзің қолыңа ал.
Өзіңсің - ақыл айнасы,
Тиеді саған мәні бар.
«Өзіңді тану пайдасы»
Жүргізуші
Жанбасаң жарық бермейсің,
Жалынсыз бекер терлейсің.
Жігерлі жанға ергейсің.
Достарым, жердің бетінде.
Жақсылық сырын тергейсің.
Өмірге екі келмейсің - демекші
Адамгершілік пен имандылық жақсылық алып келеді. Адамға жағымды нәрсенің барлығы Жақсылық ұғымы арқылы жасалады. Осы қасиет арқылы жас та, кәрі де өзінің мақсат – мүддесіне, арман тілегіне, болашақтан үміттенуіне сенімін білдіреді. Жақсылық адамның ізгілігін көрсетеді.
Жүргізуші
Есте сақтап халқының қасиетін,
Баласы ол үлкенге бас иетін.
Паш етеді ер жеткен соң бар әлемге.
Жаңарған нағыз қазақ қасиетін - демекші, ортада «Угай - ай» халық әні
Жүргізуші
Сара Алпысқызы Назарбаева:
“Мен бала жас кезінен әрқашан дені сау әрі бақытты болып өсуін, өмір даналығы мен адамзатқа қызмет ете білу бақытын игере отырып, өсуін қалаймын. Өзінің кім екендігін, не үшін өмір сүріп, не үшін талпынатынын пайымдай білсін. Әркім өзін ашып көрсете білуі тиіс” дейді
Кешігімізге алтын уақыттарыңызды бөліп келгендеріңізге көп рахмет! Тәрбие.орг сайтынан Өзімді өзім танумен өсіп келем... Тәрбие сағаты материалды тегін жүктеп сабақ барысында қолдануға рұқсат етіледі. Жарияланған материалға tarbie.org сайтының әкімшілігі жауапты емес

Авторы: Холганат Данекер

Пікірлер: 0

avatar