16 желтоқсан – Тәуелсіздік күні

  • Жүктеулер: 167
  • Көрсетілім: 3533
  • Балабақшадағы ашық сабақтар
  • 29/Мар/2016

Жарияланған материалдың жеке номері: 18205


16 желтоқсан – Тәуелсіздік күніне арналған

Тәрбиеші:
Сәлеметсіздер ме, құрметті қонақтар, ұстаздар және балалар. Біздің балабақшамыздың "Желтоқсан жаңғырығы” атты ертеңгілігіне қош келдіңіздер!
-Бүгін біз Қазақстан Республикасының Тәуелсіздік алған күнін тойлағалы отырмыз. Бәрімізге мейрам құтты болсын!!!
«Ақжелкен» тобы мен «Ақсұңқар» топтарының ертеңгілігін бастауға рұқсат етіңіздер.

Балалар ән ырғағымен залға кіреді.

Жүргізуші:
Тәуелсіздік - бастауы бар бақыттың
Тәуелсіздік - ұлтың менен ұраның
Шартаратпа шаттығыңдай азаттық
Ғасыр сүйіп тұрғандайын ғажап күн!
Көк байрағы ,Елтаңбасы, бірлігі
Шалқи берсін Әнұраны Қазақтың!

Әнұран айтылады.

Тәрбиеші сөзі:
Біз тәуелсіз елдің түлегі болғанымызға шексіз қуанамыз. Біздің отанымызды әлем таныды. Осы сәтте Отан туралы еріксіз ойға берілесің. Бұл ұғымның аясы кең. Отан – далаң, орман, тауың, ауылың мен астанаң.
Отан әр жұмыр басты пенденің киелі мекені, жер басып жүрген әр тіршілік иесінің шексіз байлығы. Тәй-тәй басқан нәресте де, еңкейген қария да оның бір мүшесі.

Қазақ халқы еркіндікке жету үшін қаншама қиын – қыстау кезеңдерді бастан кешірді. Мыңдаған жылдық тарихы бар. Ал, 1986 жылғы оқиға халықтың есінде мәңгі сақталады.
16 – желтоқсанда қазақ жастары Орталық алаңға шығып, Қазақстан тәуелсіздігін талап етті.
Бұл күн - Қазақстан тарихында тәуелсіз Қазақстан Республикасының туған күні деп алтын әріппен жазылды. Сондықтан да желтоқсан бүкілхалықтық мереке.

- Балалар, біз осы тәуелсіздікке оңайлықпен қол жеткізген жоқпыз. Оның бір көрінісі желтоқсан оқиғасы.
Желтоқсан оқиғасында ерен ерлігімен көзге түскендер өте көп, солардың бірі – Қайрат Рысқұлбеков. Ол қыршын жасын қиды. Оған үлкен айып тағылды.

Ерлігіңе қуанам да, сүйінем,
Қайрат аға рухыңа мен иілем.
Бәйшешектің солғанына ах ұрсам,
Әділ жанның қазасына күйінем – дей отырып, желтоқсан оқиғасының басты қаһарманының бірі Қайрат Рысқұлбековке телеорталық инженері «Савицкийдің өліміне кінәлі» деген айып тағылды. Қайрат Рысқұлбековтың абақтыдағы өмірінен көріністі назарларыңызға ұсынамыз.

КӨРІНІС

Абақты іші Қайрат хат жазып отыр.

Автор сөзі:
Әкетай-ау пайғамбардай жасың бар
Туа бермес сіз секілді асылдар
Қартайғанда жүрегінді жаралап
Кесір болды-ау біз секілді масылдар
Айналайын қарындасым қарағым
Қолда кісен мен айдауға барамын
Қайғы шегіп азап тартқан ағаңды
Айтшы жаным қандай жанға баладың
Айналайын інішегім ,құлыным
Сені ойласам үзіледі жұлыным
Сенің ерке ақ жүзіңді көре алмай
Кетіп барам мен айдауға құлыным
Қалдырып жаны мәңгі жас ұлынды
Құпия шерттім осы жан сырымды
Қош енді жолықпасам қайран анам
Көзімнен ақ жаулығын жасырыңды
Қайран анам күзеткенің түгелме
Көктеректе жазықсыз екенімді білеме
Бейшараңды мазақ етіп жоқ әлде
Саған дағы елің,жұртың күле ме?

Осы сәтте тергеушілер кіріп келеді.

Айтбек: Иә ,Рысқұлбеков тағы да хат жазып отырмысын?
Сен 16 желтоқсан күні сағат 10-00де қайда болдың?

Азамат: Жолдастарыммен бірге Фурманов көшесінде болдым.

Нұрас: Жоқ сен өтірік айтпа .Сен Савиицкийді өлтірдің .Сен оның өліміне кінәлісін.

Азамат: Мен ешкімді өлтірген жоқпын.

Айтбек: Мойында! Мойындасаң жазаң жеңілденеді.

Азамат: Жасамаған нәрсені қалай мойындаймын.Бұл жала ғой

Нұрас: Бұдан ешқандай пайда жоқ, оданда ісін сотқа түсірейік.

Айтбек: Жарайды онда өзінен көрсін. (шығып кетеді)

Автор: Елім деп, қазағым деп айдай әлемге жар салып, ұлтының намысын қорғаған жігерлі азамат Қайрат Рысқұлбековтың соты болар күнде жетті.

Автор: Айыпкер Рысқұлбековты тергеуге әкеліңдер!
Айыпкер Қайрат қылмыскер деп танылып 3 жылға бас бостандығынан айырылсын, жазалаудың ең ауыр түрі өлім жазасына танылсын.

Айтбек пен Нұрас келп алып кетіп бара жатқанда

Азамат:
Тоқта! Айтар сөзім бар!
21 де жасым бар,
Күнәдан таза басым бар,
Бозторғайдай жаным бар,
Алам десең алыңдар.
Қайрат деген атым бар,
Қазақ деген затым бар,
Еркек тоқты - құрбандық
Атам десең атыңдар!

Милиционерлер алып кетеді.

Тәрбиеші сөзі:
1986 жылы Алматының бас алаңына жастар жаман оймен барған жоқ. Олар бейбіт жолмен тәуелсіздікке қол жеткізу үшін қатысқан.
Енді міне, осы желтоқсан көтерілісіне қатысқан ағаларымыз бен апаларымыздың арқасында ата-бабаларымыз үш ғасырға жуық уақыт бойы армандаған тәуелсіздікке қол жеткіздік.

Бас алаңда ел жосқан,
Жастар қаны жуған түн.
16 желтоқсан-
Тәуелсіздік туған күн!

-Міне, балалар, бүгінгі таңда Қазақстан тәуелсіз мемлекет. Біздің өзіміздің туымыз, елтаңбамыз, әнұранымыз бар. Егеменді Қазақстан мемлекетіміз.
Сендер Отанымыздың ұрпақтарысыңдар. Жақсы оқып, үлгілі, тәртіпті болыңдар. Өз елің мен жеріңді көркейтіп, қазақстанның намысын қорғайтын келешек ұрпақтың ақылшысы, тірегі сендер болмақсыңдар.

Ән: «16-шы желтоқсан»

-Енді «Ақсұңқар» тобы балаларының тәуелсіздік күніне жаттаған тақпақтарын тыңдайық.

Ән: «Сарбаздар»

Жүргізуші:
Бақтың құсы әр адамға қонып бір
О, Тәңірім бізді баққа жолықтыр!
Бүгін міне Тәуелсіздік, ағайын
Әр қазақтың жүрегі боп соғып тұр! – демекші келесі кезекті «Ақжелкен» тобы балаларының тақпақтарына берейік

Ақерке:
Қайраттай қайсар ұлдардың
Жанымен келген еркіндік
Жазира мен ляззаттың
Арымен келген еркіндік
Қасірет пен қайғының
Бәрімен келген еркіндік

Жанерке:
Он алтыншы желтоқсан
Ел мерейі тасыған
Қазақ деген қалың жұрт
Бәрін кешті басынан
Он алтыншы желтоқсан
Тәуелсіздік алған күн
Ерекше боп мәңгілік
Ел жадында қалған күн

Иманали:
Әр қазақтың есінде сақталады
Желтоқсандық өрендер ақталады
Ел намысын қорғаған сарбаздарым
Ерліктерің мәңгілік сақталады.

Ақнұр:
Тәуелсіздік мәңгілік сақталсын,
Алдымызда барлық үміт ақталсын
Тату – тәтті бірлік болып қашанда
Бейбіт өмір бар халықпен жақталсын.

Айтбек:
Енді міне біз тәуелсіз ел болдық
Басқалармен терезесі тең болдық
Әрқашанда біз дайынбыз тайсалмай
Отан үшін болуға да құрбандық

Назерке:
Тәуелсіздік таңын сүйем
Таңмен бірге келді өлең
Көк туына басымды ием
Көгімізде желбіреген.

Ұлдана:
Әнді алысқа жеткіземіз
Көкке елдің туы ілінді
Жылда той қып өткіземіз
Тәуелсіздік ұлы күнді.
Маған қымбат ұлы елімнің
Шешек атқан әр гүлі
Аялайды бәрімізді
Азаттықтың таң нұры.

Өзенбай:
Сарыарқаның даласында
Күн шуағын төккен күн
Елім менің, жерім менің
Баққа қолы жеткен күн.
Сымбат:
Тәуелсіздік ұлы күнім
Тұрсын жайнап төбемде
Сен жасай бер мәңгі бақи
Қуанышқа бөлен де.

Ән: «Атамекен»

Серік:
Шырқап көкке аспан ән
Болашаққа бас қадам
Қазақ рухын биіктет
Й, бас қалам – Астана!
Қадамың бар баспаған
Асуың бар аспаған
Халқым жетсін мұратқа
Ей, бас қалам – Астана!

Алтынай:
Елтаңбасы елімнің
Неткен әйбат әдемі
Тұнығындай көңілдің
Ортада – аспан әлемі.
Құт, береке – шаңырақ
Орын алған ол төрден
Қанатты қос арғымақ
Екі жақтан көмкерген.

Сымбат:
Балабақша серпін нық
Көкке атады бөркін жұрт
Тәуелсіздік – ынтымақ
Тәуелсіздік – еркіндік.

Салтанат:
Қыста келген бақыт бұл
Қыспай берген жақұт нұр
Аппақ қардай пейілін
Әлемге елім шашып тұр.
Тәуелсіздік ел болу
Ынтымақпен өрге озу
Еркін және өзге елмен
Терезесі тең болу.

Құрметті қонақтар Назерке қызымыздың орындауында «Туған жер» әнін қабыл алыңдар.

Ән: «Туған жер»

Жүргізуші: Міне бүгінгі ертеңгілігіміз өз мәресіне жетті. Тәуелсіздігіміздің тұғыры биік, халқымыздың еңсесі жоғары, егемендігіміз баянды болсын. Көріп тамашалағандарыңызға көп-көп рахмет, сау болыңыздар. Тәрбие.орг сайтынан 16 желтоқсан – Тәуелсіздік күні Балабақшадағы ашық сабақтар материалды тегін жүктеп сабақ барысында қолдануға рұқсат етіледі. Жарияланған материалға tarbie.org сайтының әкімшілігі жауапты емес

Авторы: Басбаева Улбопе Оразымбеткызы

Маңғыстау облысы Қарақия ауданы Құрық ауылы «Құлыншақ» балабақшасы Тәрбиеші

Пікірлер: 0

avatar